మరమ్మతుల తర్వాతే నీటి పంపింగ్ : ఉత్తమ్
మేడిగడ్డ పునరుద్దరణ డిజైన్ పనులు ప్రారంభం
హైదరాబాద్: కాళేశ్వరం బ్యారేజీల పునరుద్ధరణ పనులు పూర్తిగా పూర్తయిన తర్వాతే వాటి కార్యకలాపాలు ప్రారంభం అవుతాయని రాష్ట్ర ప్రభుత్వం తీసుకున్న నిర్ణయాన్ని నీటిపారుదల శాఖ మంత్రి ఎన్. ఉత్తమ్ కుమార్ రెడ్డి గట్టిగా సమర్థించారు. మేడిగడ్డ పునరుద్ధరణ డిజైన్ పనులను కాంగ్రెస్ ప్రభుత్వం ఇప్పటికే చేపట్టిందని అన్నారు. సాంకేతికంగా మెరుగైన, ఆర్థికంగా లాభదాయకమైన , విద్యుత్ ఆదా చేసే ప్రత్యామ్నాయంగా భావిస్తున్న తుమ్మిడిహట్టి ప్రాజెక్ట్ విషయంలోనూ ఇక ముందుకు వెళ్తామని ఆయన చెప్పారు. ప్రజా భవన్లో మేడిగడ్డ బ్యారేజీ, కాళేశ్వరం ఎత్తిపోతల పథకం (KLIS)లోని ఇతర కీలక భాగాల ప్రస్తుత పరిస్థితిపై జరిగిన సమగ్ర ప్రజెంటేషన్ సందర్భంగా ఉత్తమ్ కుమార్ రెడ్డి మాట్లాడారు. ఈ కార్యక్రమంలో ముఖ్యమంత్రి ఎ. రేవంత్ రెడ్డి, మంత్రులు, ఎంపీలు, ఎమ్మెల్యేలు, ఎమ్మెల్సీలు తదితరులు పాల్గొన్నారు.
కన్నెపల్లి పంప్హౌస్ ద్వారా మేడిగడ్డ నుండి గోదావరిలో ఎగువకు నీటిని పంప్ చేయాలన్న బీఆర్ఎస్ నాయకుల డిమాండ్ అహేతుకమని, అది సాధ్యం కాదని ఆయన అన్నారు. ఎందుకంటే, మేడిగడ్డ బ్యారేజీలో కొంత భాగం కుంగి పోయినప్పటి నుండి జరిగిన సాంకేతిక పరిశీలనల ప్రకారం… మేడిగడ్డ, అన్నారం , సుందిళ్ల బ్యారేజీలు ఒకే రకమైన డిజైన్లను కలిగి ఉండి, ఒకే రకమైన లోపాలతో ఉన్నాయని తేలిందన్నారు ఉత్తమ్ కుమార్ రెడ్డి. నిర్మాణాలను మరింత నష్టం నుండి కాపాడటానికి NDSA సిఫార్సుల మేరకు బ్యారేజీల గేట్లను తెరిచి ఉంచాల్సి ఉన్నందున, మేడిగడ్డ వద్ద నీటిని నిల్వ చేయడం ఎలా సాధ్యం కాదో, అన్నారం, సుందిళ్ల వద్ద కూడా నీటిని నిల్వ చేయడం సాధ్యం కాదని స్పష్టం చేశారు. బ్యారేజీలను పునరుద్ధరించి, వచ్చే వర్షాకాలం నాటికి వాటిని వినియోగంలోకి తీసుకు రావడానికి ప్రభుత్వం కట్టుబడి ఉందని ఆయన తెలిపారు.