సచివాలయానికి కొత్త స్థలం గుర్తింపు

చెన్నై : సీఎం జోసెఫ్ విజ‌య్ ఆదేశాల మేర‌కు త‌మిళ‌నాడు ప్ర‌భుత్వ ప్ర‌ధాన కార్య‌ద‌ర్శి కీల‌క ప్ర‌క‌ట‌న చేశారు. అన్ని ఆధునిక సౌకర్యాలు గల సచివాలయ సముదాయం కోసం ఫోర్‌షోర్ ఎస్టేట్‌లో తమిళనాడు హౌసింగ్‌కు చెందిన రెండు భూభాగాలను కేటాయించినట్లు జారీ చేసిన‌ ప్రభుత్వ ఉత్తర్వులో పేర్కొన్నారు. 1639 నుంచి 1644 మధ్య ఈస్ట్ ఇండియా కంపెనీ నిర్మించిన భారతదేశంలోని మొదటి ఆంగ్ల కోట అయిన చారిత్రాత్మక ఫోర్ట్ సెయింట్ జార్జ్ నుండి సచివాలయాన్ని , అసెంబ్లీని తరలించడానికి గతంలో చాలా మంది ముఖ్యమంత్రులు అనేక ప్రయత్నాలు చేశారు. ఫోర్ట్ సెయింట్ జార్జ్ ప్రాంగణంలో స్థలాభావం ఉందని పేర్కొంటూ 1983లో ఎంజీఆర్ ఈ చారిత్రాత్మక భవనం నుండి తరలించడానికి మొదటి ప్రయత్నం చేశారు, కానీ అది జరగలేదు. ఇరవై సంవత్సరాల తరువాత, 2003లో జె. జయలలిత అధికార పీఠాన్ని మార్చి, మహాబలిపురం సమీపంలో ఒకే చోట అన్ని సౌకర్యాలు గల పరిపాలనా నగరాన్ని ప్రారంభించాలని కోరుకున్నారు. కానీ అది ఆచ‌ర‌ణ రూపం దాల్చ‌లేదు.

తాజాగా ముఖ్యమంత్రి సి. జోసెఫ్ విజయ్ సెప్టెంబర్ 3న అసెంబ్లీలో ప్రకటించిన కొత్త రూ. 1,200 కోట్ల రాష్ట్ర సచివాలయం , అసెంబ్లీ సముదాయ నిర్మాణం కోసం పట్టినాపాక్కం అని కూడా పిలువబడే ఫోర్‌షోర్ ఎస్టేట్‌లో 21.76 ఎకరాల భూమిని రాష్ట్ర ప్రభుత్వం గుర్తించింది. అన్ని ఆధునిక సౌకర్యాలు గల సచివాలయ సముదాయం కోసం ఫోర్‌షోర్ ఎస్టేట్‌లో తమిళనాడు హౌసింగ్‌కు చెందిన రెండు భూ పార్శిళ్లను కేటాయించినట్లు స్ప‌ష్టం చేసింది . కొత్త ప్రాంగణం నిర్మాణం పూర్తయిన తర్వాత, ప్రస్తుతం సచివాలయం పనిచేస్తున్న ఫోర్ట్ సెయింట్ జార్జ్ భవనాన్ని భవిష్యత్ తరాల ప్రయోజనం కోసం వారసత్వ కట్టడంగా పరిరక్షిస్తామని సీఎం విజయ్ చెప్పారు. ఇదిలా ఉండ‌గా దివంగ‌త సీఎం జ‌య‌ల‌లిత మెరీనా సముద్ర తీరంలోని క్వీన్ మేరీ కళాశాలను కొత్త సచివాలయంగా మార్చేందుకు చేసిన ప్రయత్నాలు ప్రజా వ్యతిరేకత కారణంగా విఫలమయ్యాయి.

ఆ తర్వాత 2010లో దివంగత డీఎంకే నాయకుడు ఎం. కరుణానిధి ఓమండరార్ ప్రభుత్వ ఎస్టేట్స్‌లో కొత్త సచివాలయ భవనానికి శంకుస్థాపన చేసి, నిర్మాణం చేపట్టారు. కానీ 2011లో జయలలిత తిరిగి అధికారంలోకి వచ్చినప్పుడు, ఆమె ఆ కొత్త భవనాన్ని మల్టీ-స్పెషాలిటీ ఆసుపత్రిగా, వైద్య కళాశాలగా మార్చారు. ఇప్పుడు టీవీకే ప్రభుత్వం, చారిత్రాత్మక ఫోర్ట్ సెయింట్ జార్జ్ భవనం నుండి ముఖ్యమంత్రి కార్యాలయాన్ని , కొన్ని కీలక విభాగాలను ఆ ప్రాంగణంలోని నామక్కల్ కవిజ్ఞర్ భవనం యొక్క పదవ అంతస్తుకు తరలిస్తూనే, రూ. 1,200 కోట్ల వ్యయంతో కొత్త సచివాలయాన్ని నిర్మించేందుకు ప్రయత్నిస్తోంది.