పవర్ లోకి రావడంలో టీడీపీ ఎన్నారైల కీలక పాత్ర
ప్రశంసలు కురిపించిన పార్టీ వర్కింగ్ ప్రెసిడెంట్
అమరావతి : టీడీపీ తిరిగి అధికారంలోకి రావడంలో ఎన్నారైల మద్దతు కీలక పాత్ర పోషించిందని లోకేష్ పేర్కొన్నారు. ఆ క్లిష్ట సమయంలో ‘ఐ యామ్ విత్ సీబీఎన్’ ప్రచారం తమ కుటుంబానికి ఎంతో నైతిక బలాన్ని ఇచ్చిందని ఆయన గుర్తుచేశారు. విజయవాడలో విద్యాశాఖ మంత్రి నారా లోకేష్ మాట్లాడుతూ ఆంధ్రప్రదేశ్లో టీడీపీ నేతృత్వంలోని ప్రభుత్వం తిరిగి అధికారంలోకి రావడంలో పార్టీకి చెందిన విదేశీ మద్దతుదారులు కీలక పాత్ర పోషించారని కొనియాడారు. అలాగే ప్రపంచ వ్యాప్తంగా తెలుగు సమాజాన్ని ‘నంబర్ వన్’గా నిలపాలని ఎన్నారైలకు పిలుపునిచ్చారు. మంగళగిరిలోని పార్టీ కేంద్ర కార్యాలయంలో జరిగిన ఎన్నారై టీడీపీ కేంద్ర కమిటీ ప్రమాణ స్వీకార కార్యక్రమంలో పాల్గొన్నారు. తెలుగు ప్రజలు ప్రపంచ వ్యాప్తంగా విస్తరించి ఉన్నారని, ఎన్టీఆర్ తెలుగువారి ఆత్మగౌరవానికి ప్రతీకగా నిలిచారని గుర్తు చేశారు.
ముఖ్యమంత్రిగా ఎన్.టి. రామారావు రాజకీయాల్లో విప్లవాత్మక సంస్కరణలు ప్రవేశ పెట్టారని ప్రశంసలు కురిపించారు. 2024 ఎన్నికల్లో టీడీపీ ఏడుగురు ఎన్నారైలకు పోటీ చేసే అవకాశం కల్పించిందని, వారిలో గుంటూరు ఎంపీ పెమ్మసాని చంద్రశేఖర్ కేంద్ర మంత్రిగా బాధ్యతలు చేపట్టారని లోకేష్ పేర్కొన్నారు. 2024 ఎన్నికల్లో విజయం సాధించిన అభ్యర్థులలో దాదాపు సగం మంది యువతలేనని ఆయన తెలిపారు. 2019-24 కాలం నాటి పరిస్థితులను ప్రస్తావిస్తూ అమరావతి ఉద్యమానికి ఎన్నారైలు బలమైన మద్దతు ఇచ్చారని, పార్టీ అధ్యక్షుడు చంద్రబాబు నాయుడు అరెస్టు అయినప్పుడు ఆయనకు అండగా నిలిచారని లోకేష్ గుర్తు చేశారు. 50 దేశాల్లోని 200 నగరాల్లో నిరసనలు, సంఘీభావ కార్యక్రమాలు నిర్వహించారని ఆయన చెప్పారు. ఓటు వేయడానికి చాలా మంది ఎన్నారైలు వేల డాలర్లు ఖర్చు చేసి ఆంధ్రప్రదేశ్కు వచ్చారని, ఉద్యోగాలకు సెలవు పెట్టి గ్రామాల్లో ప్రచారం నిర్వహించి, ప్రజల ప్రభుత్వం ఏర్పాటులో తమ వంతు కృషి చేశారని లోకేష్ కొనియాడారు.
ఎన్నారైలను ‘అత్యంత విశ్వసనీయ భారతీయులు’గా అభివర్ణించిన ఆయన తెలుగు భాష , తమ సొంత ప్రాంతాలపై వారికి ఉన్న అంకితభావాన్ని ప్రశంసించారు. తాము చదువుకున్న పాఠశాలల అభివృద్ధికి ఎంతోమంది ప్రవాసాంధ్రులు కోట్లాది రూపాయలు ఖర్చు చేశారని ఆయన పేర్కొన్నారు.