టాస్క్ విద్యార్థుల కోసం ఫౌండిట్ తో స‌ర్కార్ ఒప్పందం

హైద‌రాబాద్ : యువత నైపుణ్యాభివృద్ధి, ఉపాధి అవకాశాల పెంచేందుకు తెలంగాణ స‌ర్కార్ దృష్టి సారించింది. ఇందులో భాగంగా ఇవాళ ప్ర‌ముఖ శిక్ష‌ణ సంస్థ ఫౌండిట్ తో ప్ర‌భుత్వం ఒప్పందం చేసుకుంది. టాస్క్ వ్య‌వ‌స్థ‌లో నమోదైన విద్యార్థులు, ఉద్యోగార్థుల కోసం ఉపాధి సామర్థ్యాన్ని మెరుగు పరచడం, కెరీర్ సేవలను విస్తరించడం, పరిశ్రమకు అవసరమైన నైపుణ్యాలను పెంపొందించడం ,మెరుగైన ఉపాధి అవకాశాలను కల్పించడం లక్ష్యంగా వ్యూహాత్మక సహకారాన్ని ఏర్పాటు చేస్తుంది. రాష్ట్ర వ్యాప్తంగా యువతకు ఉపాధి సామర్థ్యం, ​​నైపుణ్యాభివృద్ధి కెరీర్ అవకాశాలను క‌ల్పించాల‌నే ఉద్దేశంతో తెలంగాణ ప్రభుత్వం తన ‘తెలంగాణ అకాడమీ ఫర్ స్కిల్ అండ్ నాలెడ్జ్’ ద్వారా ఉద్యోగ , ప్రతిభ వేదిక అయిన ఫౌండిట్ తో అవ‌గాహ‌న ఒప్పందం చేసుకుంది. స‌ర్కార్ ఏర్పాటు చేసిన లాభాపేక్ష లేని సంస్థ అయిన టాస్క్ భవిష్యత్తు అవసరాలకు అనుగుణంగా మానవ వనరులను తీర్చిదిద్దడానికి ప్రభుత్వం, పరిశ్రమల‌ను, విద్యా రంగాన్ని ఏకం చేసేలా పనిచేస్తుంది.

నాణ్యమైన ప్రతిభ ,మానవ వనరుల అభివృద్ధి సేవలతో పరిశ్రమకు మద్దతునిస్తూనే మ‌రో వైపు వ్యక్తిగత, సాంకేతిక, సంస్థాగత నైపుణ్యాలను బలోపేతం చేయడం ద్వారా యువత ఉపాధి సామర్థ్యాన్ని పెంచడంపై దీని కార్యక్రమాలు దృష్టి సారిస్తాయి. టాస్క్ విస్తృత విద్యా నెట్‌వర్క్‌ను ఫౌండిట్ సాంకేతిక ఆధారిత కెరీర్ పరిష్కారాలు, లేబర్ మార్కెట్ సమాచారంతో అనుసంధానించడం ద్వారా విద్య నుండి ఉపాధికి బలమైన మార్గాలను సృష్టించాలని ఈ భాగస్వామ్యం లక్ష్యంగా పెట్టుకుంది. భవిష్యత్తు పని విధానాలకు అనుగుణంగా మన యువతను సిద్ధం చేయడానికి కేవలం సాంకేతిక నైపుణ్యాలను పెంపొందించడం సరిపోదు. వారికి సరైన కెరీర్ మార్గదర్శకత్వం, పరిశ్రమకు సంబంధించిన అవగాహన ,అవకాశాలను కల్పించడం అవసరం అని పేర్కొంది ప్ర‌భుత్వం.