థలసేమియా, సికిల్ సెల్ అనీమియా రోగులకు పింఛన్లు

హైదరాబాద్ : రాష్ట్రంలోని థలసేమియా , సికిల్ సెల్ అనీమియా రోగులందరికీ పింఛన్లు మంజూరు చేయాలని ముఖ్యమంత్రి రేవంత్ రెడ్డి ఆదేశించారు. అర్హులైన వారిని గుర్తించి, వెంటనే ప్రక్రియను ప్రారంభించాలని సూచించారు. ఈ పింఛన్లు బాధిత కుటుంబాలకు ఉపశమనం కలిగిస్తాయని సీఎం పేర్కొన్నారు. ఆగస్టు 15 నుండి పింఛన్ల పంపిణీని ప్రారంభించాలని ఆయన ఆదేశించారు. ఎ. రేవంత్ రెడ్డి మంత్రి సీతక్కతో కలిసి పంచాయతీ రాజ్ , గ్రామీణాభివృద్ధి శాఖలపై సమీక్ష నిర్వహించారు. రాష్ట్రంలోని వితంతువులు, ఒంటరి మహిళలు, చేనేత కార్మికులు, గీత కార్మికులందరికీ తగిన మొత్తంలో పింఛన్లు మంజూరు చేయాలని స్ప‌ష్టం చేశారు. దివంగత దివ్యాంగుల భార్యలకు వెంటనే పింఛన్లు అందించాలని ఆయన ఆదేశించారు. ఈ విషయంలో ఎలాంటి జాప్యానికి తావు ఉండకూడదని ఆయన స్పష్టం చేశారు.

మండల స్థాయిలో వివిధ శాఖల ఆధ్వర్యంలో చేపట్టే అభివృద్ధి పనులన్నింటినీ ఎంపీడీఓలు పర్యవేక్షించేలా చూడాలని అన్నారు. ప్ర‌తి 45 రోజులకు ఒకసారి మండల పరిషత్ సమావేశాలు నిర్వహించాలని, ఈ సమావేశాలకు ఎంపీలు, ఎమ్మెల్యేలు , ఎమ్మెల్సీలను ఆహ్వానించాలని ఆయన సూచించారు. ఈ సమావేశాలు సర్పంచ్‌లు తమ గ్రామానికి సంబంధించిన సమస్యలను అధికారుల దృష్టికి తీసుకు వెళ్లడానికి సహాయ పడతాయని సీఎం పేర్కొన్నారు. రాష్ట్రంలో తారు రోడ్డు లేని గ్రామం ఉండకూడదని ఆయన అన్నారు. ప్రతి గ్రామానికి తారు రోడ్లు నిర్మించాలని, ప్రతి పంచాయతీకి పంచాయతీ కార్యాలయ భవనాలను నిర్మించాలని సీఎం ఆదేశించారు. జనాభా ఆధారంగా పంచాయతీలను A, B, C తరగతులుగా విభజించి భవనాలను నిర్మించాలని సూచించారు. పారిశుధ్య పనులు , ఇతర అంశాలపై కార్యదర్శులు పూర్తి బాధ్యత వహించాలని అన్నారు .