తమిళనాడు ప్రబుత్వంతో ‘వాల్ గ్రీన్స్’ అవగాహన ఒప్పందం
అమెరికా లో గుర్తింపు పొందిన ఆరోగ్య సంరక్షణ సంస్థ
చెన్నై : అమెరికాకు చెందిన ప్రముఖ ఆరోగ్య సంరక్షణ , ఫార్మసీ సేవల సంస్థ వాల్గ్రీన్స్ సంచలన ప్రకటన చేసింది. భారతదేశంలో తన మొదటి గ్లోబల్ కెపాబిలిటీ సెంటర్ ను చెన్నైలో ఏర్పాటు చేయడానికి సిద్ధంగా ఉందని వెల్లడించింది. మొదటి సంవత్సరంలో 250కి పైగా అధిక-విలువైన ఉద్యోగాలను సృష్టించి, రాబోయే సంవత్సరాల్లో కార్యకలాపాలను విస్తరించాలని యోచిస్తున్నట్లు తమిళనాడు ప్రభుత్వం అధికారికంగా ప్రకటించింది. సచివాలయంలో ముఖ్యమంత్రి సి. జోసెఫ్ విజయ్ సమక్షంలో వాల్గ్రీన్స్ ఇండియా ప్రైవేట్ లిమిటెడ్ కంపెనీ తమిళనాడు ప్రభుత్వంతో ఒక అవగాహన ఒప్పందం పై సంతకం చేసింది.. కొత్తగా ప్రకటించిన ఓఎంఆర్ జీసీసీ కారిడార్లోని తారామణిలో ఉన్న డీఎల్ఎఫ్ డౌన్టౌన్ కాంప్లెక్స్లో ఈ కొత్త జీసీసీ ఏర్పాటు కానుంది. ఈ కేంద్రం ప్రారంభంలో మొదటి సంవత్సరంలో 250 మందికి అధిక-విలువైన ఉపాధిని కల్పిస్తుంది,
రాబోయే సంవత్సరాల్లో విస్తరణకు ప్రణాళికలు ఉన్నాయని వెల్లడించింది. అలాగే ఈ సదుపాయం టెక్నాలజీ , వ్యాపార సేవలపై దృష్టి సారిస్తుంది. యునైటెడ్ స్టేట్స్లో ప్రధాన కార్యాలయం ఉన్న వాల్గ్రీన్స్ అనేక రకాల ఆరోగ్య సంరక్షణ , వినియోగదారుల ఆరోగ్య ఉత్పత్తులను అందించే ఒక గ్లోబల్ ఫార్మసీ , హెల్త్కేర్ కంపెనీ. చెన్నైలోని ఈ సదుపాయం భారతదేశంలో కంపెనీ మొదటి జీసీసీ అవుతుంది. జీసీసీ రంగంలో అధిక-విలువైన ఉపాధిని సృష్టించే తమ ప్రయత్నాలకు ఈ అవగాహన ఒప్పందం మరింత మద్దతు ఇస్తుందని పేర్కొంది. టెక్నాలజీ, వ్యాపార సేవల కోసం రాష్ట్రాన్ని ఒక గ్లోబల్ హబ్గా బలోపేతం చేస్తుందని తమిళనాడు ప్రభుత్వం తెలిపింది.
ఈ కార్యక్రమంలో తమిళనాడులోని టైర్-II , టైర్-III నగరాల్లో యువతకు ఉపాధి అవకాశాలు కల్పించేందుకు అన్వేషించాలని ముఖ్యమంత్రి సి. జోసెఫ్ విజయ్ కంపెనీని కోరారు. ఈ కార్యక్రమంలో పరిశ్రమల శాఖ మంత్రి ఎస్. కీర్తన, ప్రధాన కార్యదర్శి డా. ము. సాయికుమార్, పరిశ్రమల శాఖ అదనపు ప్రధాన కార్యదర్శి డా. ఎస్. విజయకుమార్, గైడెన్స్ ఎండీ , సీఈఓ దీపక్ జాకబ్, వాల్గ్రీన్స్ జీసీసీ హెడ్ ఉమాపతి విశ్వనాథన్, వాల్గ్రీన్స్ డైరెక్టర్ మసూద్ అహ్మద్ కూడా పాల్గొన్నారు.