కావేరీ వివాదంపై అఖిలపక్ష సమావేశం ఏర్పాటు చేయాలి
సీఎం జోసెఫ్ విజయ్ ను డిమాండ్ చేసిన ఏఐడీఎంకే
చెన్నై : కావేరీ వివాదంపై కర్ణాటక రాష్ట్ర ప్రభుత్వం అనుసరిస్తున్న ఏకపక్ష విధానంపై అన్నాడీఎంకే తీవ్ర స్తాయిలో మండిపడింది. దీనిపై వెంటనే అఖిలపక్ష సమావేశం ఏర్పాటు చేయాలని తమిళనాడు సీఎం విజయ్ చంద్రశేకర్ కు విజ్ఞప్తి చేసింది. చారిత్రక ఒప్పందాలను ఉల్లంఘించి కర్ణాటక ఇప్పటికే నాలుగు ఆనకట్టలను నిర్మించిందని ఆరోపించింది. తమిళనాడుకు నీటి ప్రవాహాన్ని పూర్తిగా అడ్డుకునేలా మేకెదాటు ఆనకట్ట నిర్మాణానికి ప్రయత్నిస్తోందని అన్నాడీఎంకే నేత ఆర్.బి. ఉదయకుమార్ ఆరోపించారు. కావేరీ జల వివాదంపై కర్ణాటక ప్రభుత్వం వ్యవహరిస్తున్న తీరును సీనియర్ నేత తీవ్రంగా విమర్శించారు. తమిళనాడును కేవలం తమ అదనపు నీటిని వదిలేసే డ్రైనేజీగా భావిస్తూ, ఆ పొరుగు రాష్ట్రం ఆధిపత్య ధోరణిని ప్రదర్శిస్తోందని ఆయన ఆరోపించారు.
చట్టబద్ధమైన సంస్థల ఆదేశాలను కర్ణాటక నిరంతరం విస్మరించడం పట్ల తీవ్ర ఆందోళన వ్యక్తం చేశారు ఉదయకుమార్, రాష్ట్ర నదీ జలాల హక్కుల విషయంలో ఐక్యంగా నిలబడేందుకు తమిళనాడు ముఖ్యమంత్రి సి. జోసెఫ్ విజయ్ వెంటనే అఖిలపక్ష సమావేశాన్ని ఏర్పాటు చేయాలని కోరారు. ఆనకట్టలు నిండినప్పుడు తమను తాము రక్షించుకోవడానికి మాత్రమే అదనపు నీటిని విడుదల చేయడం కర్ణాటక ప్రభుత్వ ఆధిపత్య ధోరణిని బయట పెడుతోందని మండిపడ్డారు. చారిత్రకంగా వారు తమిళనాడును తమ డ్రైనేజీ వ్యవస్థ తప్ప మరొకటిగా చూడలేదంటూ ఆగ్రహం వ్యక్తం చేశారు. సుప్రీంకోర్టు, కావేరీ జలాల నిర్వహణ అథారిటీ , కావేరీ జలాల నియంత్రణ కమిటీ, కావేరీ జల వివాదాల ట్రిబ్యునల్ జారీ చేసిన ఆదేశాలను కర్ణాటక పదేపదే విస్మరించిందని ఎత్తిచూపారు.