మైనారిటీ టాపర్ల కోసం సన్మాన కార్యక్రమం
సీఎం కార్యక్రమ ఏర్పాట్లపై అజారుద్దీన్
హైదరాబాద్ : విద్యా సంస్థలలో అత్యున్నత ప్రతిభ కనబర్చిన మైనార్టీ విద్యార్థులకు సన్మాన కార్యక్రమం ఉంటుందని స్పష్టం చేశారు మైనార్టీ శాఖ మంత్రి మహమ్మద్ అజారుద్దీన్. బుధవారం సమీక్ష చేపట్టారు. ఈనెల 13న గురువారం జరగనున్న ముఖ్యమంత్రి శ్రీ ఎ. రేవంత్ రెడ్డి సన్మాన కార్యక్రమ ఏర్పాట్లపై ఆరా తీశారు. ఈ కార్యక్రమంలో గ్రూప్-I, గ్రూప్-II, ఐఐటి-జెఇఇ, ఇఎపిసిఇటి, ఇతర పోటీ పరీక్షలలో రాణించిన మైనారిటీ వర్గాలకు చెందిన ప్రతిభావంతులైన విద్యార్థులను, అలాగే ఎస్ఎస్సి , ఇంటర్మీడియట్ పరీక్షలలో తెలంగాణ మైనారిటీస్ రెసిడెన్షియల్ ఎడ్యుకేషనల్ ఇన్స్టిట్యూషన్స్ సొసైటీ (టిజిఎంఆర్ఇఐఎస్) టాపర్లను సన్మానిస్తారు.
ఈ సమావేశంలో మంత్రి మహమ్మద్ అజారుద్దీన్ ఉన్నతాధికారులతో ఏర్పాట్లను సమీక్షించి, విద్యార్థులు, వారి కుటుంబాలు , అతిథుల కోసం అవసరమైన అన్ని సౌకర్యాలతో, ఈ కార్యక్రమం సజావుగా, క్రమపద్ధతిలో జరిగేలా చూడాలని సంబంధిత శాఖలను ఆదేశించారు. మైనారిటీ విద్యార్థులలో విద్యా ప్రతిభను గుర్తించి, ప్రోత్సహించాల్సిన ఆవశ్యకతను మంత్రి నొక్కి చెప్పారు. టాపర్ల విజయాలు మరింత మంది యువతను ఉన్నత విద్యను అభ్యసించడానికి, పోటీ పరీక్షలను ఆత్మ విశ్వాసంతో ఎదుర్కోవడానికి ప్రేరేపిస్తాయని ఆయన పేర్కొన్నారు.
ఈ కార్యక్రమాన్ని విజయవంతంగా నిర్వహించడానికి సరైన భద్రత, ట్రాఫిక్ నిర్వహణ, పారిశుధ్యం, వైద్య సహాయం, అగ్నిమాపక భద్రత, పౌర సౌకర్యాలు, ఇతర లాజిస్టికల్ ఏర్పాట్లను నిర్ధారించడానికి సంబంధిత శాఖలన్నింటి మధ్య సన్నిహిత సమన్వయం అవసరమని నొక్కిచెప్పారు. ఈ సమీక్షా సమావేశంలో తెలంగాణ ప్రభుత్వ సలహాదారు మహమ్మద్ అలీ షబ్బీర్, టీజీఎంఆర్ఈఐఎస్ అధ్యక్షుడు ఫహీం ఖురేషీన్, మైనారిటీ సంక్షేమ శాఖ కార్యదర్శి బి. షఫియుల్లా, ముఖ్య కార్యదర్శి అహ్మద్ నదీమ్ ,ఇతర సీనియర్ అధికారులు పాల్గొన్నారు.