సీజేపీ కోసం అధికారిక ప్రతినిధుల నియామకం
ప్రకటించిన పార్టీ స్పోక్స్ పర్సన్ సౌరవ్ దాస్
న్యూఢిల్లీ : భారత దేశంలో సంచలనంగా మారింది కాక్రోచ్ జనతా పార్టీ (బొద్దింకల పార్టీ) . ఆ పార్టీ ఈనెల 6వ తేదీన దేశ రాజధాని ఢిల్లీలో నిరసన కార్యక్రమాన్ని ప్రకటించింది. ఇందుకు గాను సీజేపీకి ముగ్గురు అధికారిక ప్రతినిధులను నియమించారు. ఇక సోషల్ మీడియా వేదికలపై ఆదరణ పొంది, లక్షలాది మంది అనుచరులతో జాతీయ రాజకీయాల్లో హాట్ టాపిక్గా మారిన ‘బొద్దింకల జనతా పార్టీ’ ఇప్పుడు డిజిటల్ తెరలను దాటి వీధుల్లోకి అడుగు పెడుతోంది.కేవలం మీమ్స్, వ్యంగ్యాలతో సంతృప్తి చెందకుండా, క్షేత్రస్థాయి క్రియాశీలతకు సిద్ధమవుతున్న తరుణంలో, దాని గురించి దేశ వ్యాప్తంగా ఆసక్తికరమైన చర్చలు జరుగుతున్నాయి. దేశ విద్యా వ్యవస్థలోని లోపాలను ఎత్తిచూపడమే కాకుండా, విద్యాశాఖ మంత్రి ధర్మేంద్ర ప్రధాన్ రాజీనామాను డిమాండ్ చేస్తూ జాతీయ రాజధాని ఢిల్లీలోని జంతర్ మంతర్ వద్ద శాంతియుత నిరసనకు పార్టీ పిలుపునిచ్చింది. ఈ విషయం అందరికీ తెలిసిందే. అంతేకాకుండా ఈ కార్యక్రమాన్ని విజయవంతం చేయడానికి , తమ పార్టీ విధానాలను ప్రజలకు తెలియ జేయడానికి, బొద్దింకల పార్టీ ముగ్గురు అధికారిక ప్రతినిధులను నియమించింది.
నిరసన కార్యక్రమాన్ని ఎంతో ప్రతిష్టతో నిర్వహిస్తూ, బొద్దింకల పార్టీ వ్యవస్థాపకుడు అభిజిత్ దీప్కే ఈ నెల 6వ తేదీ ఉదయం భారతదేశానికి రానున్నట్లు ప్రకటించారు. ఇప్పటి వరకు అమెరికాలో నివసిస్తూ, అభిజిత్ ‘కాక్రోచ్ పార్టీ’ పేరుతో సోషల్ మీడియాలో వ్యంగ్య పేజీలను నడుపుతున్నారు; క్షేత్రస్థాయి క్రియాశీలతకు ఆయన ఇచ్చిన ప్రత్యక్ష పిలుపు తీవ్ర చర్చనీయాంశంగా మారింది. జంతర్ మంతర్ వద్ద శాంతియుత నిరసన ప్రదర్శనకు అనుమతి కోరేందుకు నేరుగా పార్లమెంట్ స్ట్రీట్ పోలీస్ స్టేషన్కు వెళ్తానని ప్రకటించారు. కేంద్ర విద్యాశాఖ మంత్రి ధర్మేంద్ర ప్రధాన్ రాజీనామా చేయడమే ఈ ప్రదర్శన ఏకైక డిమాండ్గా ఉంటుందని ఆయన పేర్కొన్నారు. ఎలాంటి రాజకీయ జెండాలు లేకుండా, కేవలం విద్యార్థుల భవిష్యత్తు కోసం అందరూ ఏకం కావాలని కాక్రోచ్ పార్టీ పిలుపునిచ్చింది.
పార్టీని మరింత వ్యవస్థీకృతం చేసే ప్రయత్నంలో భాగంగా, తొలిసారిగా ముగ్గురు అధికారిక ప్రతినిధులను నియమించింది. వారిలో సీనియర్ జర్నలిస్ట్ సౌరవ్ దాస్, చిత్రనిర్మాత విజయ్ దహియా, అశుతోష్ రాంకా ఉన్నారు. ఈ ముగ్గురూ ఢిల్లీలో సంయుక్తంగా అధికారిక విలేకరుల సమావేశం నిర్వహించారు. జంతర్ మంతర్ వద్ద జరగబోయే నిరసన కార్యక్రమం గురించి వారు వివరించారు. ప్రస్తుతం ఈ ముగ్గురి నియామకానికి సంబంధించి విస్తృత చర్చలు జరుగుతున్నాయి. జర్నలిస్ట్ సౌరవ్ దాస్కు పరిశోధనాత్మక జర్నలిజంలో విస్తారమైన అనుభవం ఉంది. ఆయన సామాజిక సమస్యలపై పోరాడే వ్యక్తిగా గుర్తింపు పొందారు. అదేవిధంగా, ఢిల్లీ కాలుష్యానికి వ్యతిరేకంగా నిరసన ప్రదర్శనలు నిర్వహించి గతేడాది ప్రాముఖ్యత పొందిన చిత్రనిర్మాత విజయ్ దహియాకు బొద్దింకల పార్టీ కీలక బాధ్యతలు అప్పగించింది. అంతర్జాతీయ వ్యవహారాలపై అవగాహన ఉన్న అశుతోష్ను అధికారిక ప్రతినిధిగా నియమించడం కూడా గమనార్హంగా నిలుస్తోంది.
ఇప్పుడు, ఈ నియామకాలతో, బొద్దింకల పార్టీ నిజంగా ఒక పూర్తిస్థాయి రాజకీయ వేదికగా రూపాంతరం చెందుతుందా లేదా అనే దానిపై చర్చలు తీవ్రమవుతున్నాయి. కేవలం 15 రోజుల క్రితం పుట్టిన ఈ డిజిటల్ ఉద్యమం, ఇప్పుడు పత్రికా సమావేశాలు నిర్వహిస్తూ, ప్రతినిధులను నియమిస్తూ, భవిష్యత్తులో ఇది ఒక నమోదిత రాజకీయ పార్టీగా ఎదుగుతుందా అనే ఊహాగానాలకు దారితీస్తోంది. అయితే, తాము కేవలం యువత సమస్యల కోసం పోరాడే ఒక వేదిక మాత్రమేనని, ఎన్నికల రాజకీయాల్లోకి ప్రవేశించేందుకు ప్రస్తుతానికి తమకు ఎలాంటి ప్రణాళికలు లేవని నిర్వాహకులు స్పష్టం చేస్తున్నారు
ఇదిలా ఉండగా, ప్రతిపక్ష పార్టీలు తెరవెనుక బొద్దింకల పార్టీకి మద్దతు ఇస్తున్నాయని అధికార వర్గాలు ఆరోపిస్తున్నాయి. వ్యవస్థాపకుడు అభిజిత్ దీప్కేకు ఆమ్ ఆద్మీ పార్టీతో గతంలో ఉన్న రాజకీయ సంబంధాలను వారు ఎత్తి చూపుతున్నారు. అంతేకాకుండా, సమాజ్వాదీ పార్టీ నాయకుడు అఖిలేష్ యాదవ్, తృణమూల్ కాంగ్రెస్ ఎంపీ మహువా మోయిత్రా వంటి ప్రముఖులు బొద్దింకల పార్టీకి మద్దతుగా నిలవడంతో, ఇది తమ ఆరోపణలకు బలం చేకూరుస్తోందని అధికార పక్షం వాదిస్తోంది. అంతేకాక, బొద్దింకల పార్టీకి లక్షలాది మంది డిజిటల్ అనుచరులు ఉండటంతో, క్షేత్రస్థాయిలో దానికి మద్దతు లభిస్తుందా లేదా అనేది కూడా ఆసక్తికరంగా మారింది. దాదాపు రెండు కోట్ల మంది అనుచరులు ఉన్నప్పటికీ, ఢిల్లీలో జరిగే ప్రత్యక్ష నిరసన ప్రదర్శనకు ఎంతమంది విద్యార్థులు, యువత హాజరవుతారనే ప్రశ్న మిలియన్ డాలర్ల ప్రశ్నగా మారిందని వారు అంటున్నారు.